Ebook: ሕገክራሲ: የነጻነት ዴሞክራሲ

ኢትዮጵያ በዓለም ላይ ከአሉ ቀደምት እና ጥንታዊ ከእሚባሉ ሐገራት ተርታ የእምትመደብ ነች። በአክሱም መናገሻነት እራሷን በአግባቡ የተደራጀች እና የተዋጣለት ንጉሣዊ ሥረዓት ዘርግታ በብሔራዊ ሐገርነት ከተቋቋመች 2 ሺ ዓመታት ገደማ አስቆጥራለች።

ይኽም ብቻ ግን አይደለም የኢትዮጵያ ታሪክ ፤ በጣሊያን ለአምስት ዓመት ከደረሰባት ወረራ በስትቀርም ፤ ለእነ እዚኽ 2 ሺ ዓመታት አስተዳደራዊ ነጻነቷን አስጠብቃ በመኖሯም ፤ በእዚኽ ረገድ እንደ ኢትዮጵያ አስተዳደራዊ ነጻነቱን ሳይቆራረጥ ለእዚኽን ያህል ግዜ አስጠብቆ በመኖርም ከዓለማችን ላይ ብቸኛ ሐገር ያደርጋታል።

ይኽን መሰል አንጸባራቂ ታሪክ ያላት ኢትዮጵያ ግን ፤ ምንም እንኳን በእየለቱ ኹለት እርምጃ ወደ ፊት እና አንድ እርምጃ ወደ ኋላ በእሚባል ዓይነት ፖለቲካዊ መዋቅሯን ተገቢውን መልክ ለማስያዝ ረጅም ድካም ብትደክምም እና የተወሰኑ ርቀት ብትጓዝም ፤ ገሚስ በታሪካዊ ኹኔታዎች አስገዳጅነት ገሚስ ደግሞ ከእዚኽ በእሚመጣ የማሕበረ ኢከነሚ ግንዛቤ እጥረት ምክንያት ፤ በኢከነሚውም ሆነ በፖለቲካው መስክ ታሪካዊ አዛውንትነቷን የእሚመጥናት ስኬት ማስመዝገብ እንደ አልቻለች የብዙ ኢትዮጵያዊያን ስምምነት አለ።

በእዚኽ ሕገክራሲ በእሚለው መጽሐፍም ፤ ኢትዮጵያ በኢከነሚው እና በፖለቲካው መስክ የእሚጠበቅባትን አመርቂ ውጤት እንደ አታስመዘገብ የአገዷትን ታሪካዊ እና የግንዛቤ እጥረት ችግሮች በመንቀስ እና በመተንተን ፤ ኢትዮጵያ የእሚጠበቅባትን አመርቂ ውጤት በኢከነሚው እና በፖለቲካው ማስመዝገብ ከአለባት በሳይንሱ መሠረት ሕዝባዊ የሆነ ሕገመንግሥት መንደፍ እና በሥራ ላይ በማዋል መጀመር አለባት በእሚል ኃሳብ አቀርባለኹ።