Ebook: Mwen Konnen Poukisa Zwazo ki nan kalòj la ap chante

“Zèv n ap prezante la a: ‘Mwen konnen poukisa zwazo ki nan kalòj la ap chante’, se premye otobiyografi Maya Angelou te ekri. Li se premye liv nan Koleksyon Jaliyaa a ki se yon koleksyon tradiksyon zèv literè nwa yo an kreyòl. Premye liv sa a te tèlman fè bri lè l te pibliye an 1969, li te tou tabli renome Maya Angelou kòm yon gwo ekriven nan monn entènasyonal la. Travay literè li te kontinye pibliye yo tankou sis lòt otobiyografi, liv powèm, ak liv pou enspire ak motive moun viv byen te konfime talan l non sèlman kòm ekriven; men tou kòm yon ‘Peace Warrior’ (Sòlda Lapè).

Se nan vil St. Louis, kapital eta Missouri, Maya te fèt jou ki te 4 avril 1928 la. Se nan yon zòn ak nan yon epòk kote blan ak nwa pa t mele. Chak koulè te genyen katye pa yo, lekòl pa yo, legliz pa yo; epi pou dan griyen blan yo te ka met men sou yon moun nwa pou pann li. Kidonk, se pa t yon ti koze pou yon ti fi nwa tankou Maya te grandi, evolye, epi pou l te vin yon gran ekriven, yon gran fanm ki kanpe nan peyi a. Mwen te apresye jan Maya Angelou te ouvri yon pòt pou mennen n antre anndan imajinasyon l kòm timoun nwa ki t ap grandi nan Sid peyi Etazini nan ane 1930, 1940 ak 1950 yo.”