Ebook: Robertson, 1853-1953 : gedenkboek by geleentheid van die honderdjarige bestaan van die dorp en die N.G. Gemeente Robertson

Wat die leser hierby aangebied word, is nie bedoel om `n volledige gedokumenteerde geskiedenis van Robertson te wees nie. Daarvoor was die tyd waarin die taak voltooi moes word, te kort vir een persoon wat boonop nog sy daaglikse pligte moes nakom. Daarom is toe besluit om dan maar te probeer om die lig te laat val op enkele aspekte van die dorp en distrik se verlede.

As in gedagte gehou word dat Robertson in die eerste plek gestig is om die setel van `n gemeente te wees, dat die N.G. Kerk die dorp aangelê en jare lank bestuur het en dat die Kerk op verskeie ander gebiede die hoofrol gespeel het, sal dit my seker nie ten kwade gedui word nie dat soveel aandag aan die geskiedenis van die gemeente gewy is. Onderwys is van die aanvang af beskou as 'n belangrike saak en daarom kon dit nie verbygegaan word nie. Besproeiing het die hele aanskyn van die distrik verander, en die geskiedenis da&rvan verdien ook beslis vermelding.