Ebook: Сульманэди цунмин хуа – Мудрые изречения Сулеймана – 箴言 – Zhēn Yán

Җыгә чўбан зэ «Шын Җинди*» Зэбур буфын литуни. Ба җы йи бын фу дин цунминди* Исраилди хуоншон Сульманэ щехади. Шонли суйфуди сыхур Сульманэ щелигә «Цунмин хуа». Ба кугәр суандисы заён җётёди йиҗян лян минлён щинщён. Зэ җы йи бын фу литу Сульманэ ба цунмин хуа, фучин ги зыҗиди эрзы гиди җётё шудо йидарнили. Зэ җытар җибянҗя тифәдисы замуҗя ё гуан зыҗиди җяхўни, замуҗя ё җян йигә щифурни, замуҗя лян данлин жынму щёнхони хан замуҗя зэ хуоншон мянчян занни. Фуди җун-ё тиму – җысы зэ Хўдади мянчян ё гуә гундо гуонйин жызыни. Дин җун-ёдисы пащён Хўда. Лян данлин хуа фәчи, зэ йиче зыҗиди сынхуәшон тэнэ Хўда, зунхў Тади фалү. Зэ фу литу ги Хўдади Цунмин лю да шындини, Та ба жынму чүанфәди җё гуә гундо гуонйин жызыни. Хўдади Цунмин би йиче данлин дунщи щянчян зу юлэ. Хўда зо дун-яди сыхур, Цунмин зу лян Та зэ йидарнилэ. Җытар хан куаҗён Хўдади Цунминдини, ба Та, зулян нүжынди ёнзы йиён, кангидини. Та щён ба зыҗиди җышы дэ йиха канчўлэди сычин ги жынму гищер. Лян Цунмин зў лэвон – җы зулян гуә янщиди йиён, зэ сашон ба йиче жын чинлэдини. До жыншон Цунмин би җинзы ду җычян. Зу Та ги хуоншонму бонди җё фәгуанни, җё фагуанму вын гуансыни. Хўдўди щинщён дэ тади сынхуә зущён лян буҗысысади нүжын зў лянщиди йиён. Фуди линйиршон куаҗён кочўди, җыгўди щифузыдини (31:10-31). Та зусы гундо дэ цунминди ёнзы – «Та би йичеди бошы гуйҗун». Сывынди ёнзысы җымуҗяди: ту йигә хуади ту йигә зы йидарни зуәзо яхўти зымудини. Суйжан «Цунмин хуа» лён чян бан нян зочян щехадини еба, кәсы зэ та литу тифәди жынмуди вынти дэ хуэйда до вуҗинди сыхур хансы ёҗинди. Йинви нэгә вәму ба җы йи бын фу фандо вәму җыдоди сангә йүяншонли – хуэйзўйүшон, ханйүшон дэ вурусйүшон, җё нянҗяму нын ба таму йиҗя лян йиҗя биди канйихар, җё ба литу фәхади Цунмин дыйшон.

---