Ebook: Gülümsemää - diil günaa

Ankara: M. Maruneviç adına bilim aaraştırmaları merkezi Genel üüretmäk müdürlüü, 2012. — 112 s.Mina Kösä gagauz şairlerindän ilk pleyadasından biridir. Duuması 1933 yılda avgust ayın 15-dä Beşalma küüyündä, Komrat dolayında. Onun ana-boba evi bir eski çiftçi aylesiydi, gagauz şairin uşaklıı geçer bu çok zaametçi insannarın arasında, kendisi taa eşil küçüklüündän hep işä koşulmuştu. Bezbelli, bu üzerä onun en büük sevdası da bütün ömüründä baalıydı zaametä, kırlarımıza, çiftçilerä ana tarafımıza. Elbetki onun şiirleri da bu sevdadan sızerlar, onnar pak hem duruk nicä bir temiz kaynarcadan. Onun şkolada üürenmesi da geçti o dolaşık zamannarda, açan tarafımız 20-30 yılların içindä geçti ellerdän ellerä. Uşaklarımızı da üüredirdilär çok türlü dillerä sadä diil ana dilimizä. 1946-1947-nci yıllarda, büük açlıın ardına Mina Kösä kendi küçüklük kafadarınnan D. Kara Çobannan, barabar gider da yakın komşu Kongaz küüyündä 7 klas başarer bak ozamannar Kongaz rayon merkeziydi, ama kendi küüylerindä, Beşalmada, orta şkola taa yoktu.Kolhozlar çeketmesindä M. Kösä bir parça vakıt işleer kolhozda kendi küüyündä sıradan işçi.