Ebook: Wei Fo Raetem Olketa Wod Long Pijin

Honiara: Solomon Islands Translation Advisory Group (SITAG), — 22 p.Disfala buk hemi som yumi evriwan long Solomon Aelan wanfala stretfala wei fo raetem olketa wod long Pijin. Disfala buk ya hemi no barava diksonari, bat hemi wanfala stat blong hem nomoa. Baebae mifala mas waka long diksonari fo samfala yia moa yet, so hemi moabeta fo disfala buk hemi kamaot distaem nao. Hemi olsem, bikos hemi barava gud tumas fo yumi evriwan long Solomon i raetem olketa wod long Pijin long wanfala wei nomoa.
Nao diswan hemi no minim yumi evriwan mas toktok long Pijin long sem wei. !Nomoa ya! Buk ya hemi no fo talem yu hao nao yu mas toktok long Pijin. Nomata yumi garem wanfala wei fo raetem Pijin, olsem disfala buk hemi talem, diswan hemi no minim dat sapos yu kam from Soesol yu mas toktok olsem man from Galekana, o sapos yu kam from Temotu yu mas toktok olsem man from Malaita.