Ebook: Gramática da lingua galega. III. Semántica

Vigo: A Nosa Terra, 2006. - 361 p.Dentro do proxecto xeral de Gramática da LÍngua Galega en que estamos a traballar publícase agora este terceíro volume de semántica, que sae do prelo a continuación do volume dedicado á fonética e á fonoloxía; ambos conforman a periferia do estudo gramatical do galego. Déixase para o final o volume de morfosintaxe, verdadeiro núcleo da gramática dunha lingua.
Dáselle a esta parte o título xeral de semántica, que preferimos ao de léxico-semántica, pois o léxico é parte consubstancial da semántica e mesmo a formación de palabras se integra na semántica como conformadora das estruturas lexicais paradigmáticas secundarías. Ben é certo que tamén os procesos de formación de palabras son procesos morfolóxicos e, por tanto, poderían ser estudados dentro da morfoloxía, mais, ao pormos o acento no contido, é na semántica onde
mellor encadramento achan. Alén diso, ao seren significativamente diferentes os morfemas gramaticais dos morfemas lexicais, parece conveniente estudarmos as unidades de significado gramatical dentro da morfosintaxe (a gramática propiamente dita) e as unidades de significado lexical dentro da semántica. Desta forma, por outra parte, o proxecto en que este volume se inclúe resulta máis equilibrado.Aínda que o estudo do léxico galego é obxectivo central deste traballo por seren as estruturas lexicais as que aquí fundamentalmente se tratan, porén prescindirase da perspecüva diacrónica na conformación do léxico galego, tanto por ser este un estudo sincrónico como por dispormos xa dun moi completo traballo sobre lexicoloxía galega desde esa perspectiva (Ferreiro 1997).
Este volume segue os criterios xerais xa anunciados no primeiro (Gramática da Lingua Galega I. Fonética e fonoloxía). Do punto de vista teórico procura mover-se dentro dos principios da semántica estrutural ou funcional, con especial seguimento dos postulados de E. Coseriu e de M. Vilela; os traballos deste último, a quen agradecemos algunhas interesantes observacións, fóronnos de especial axuda por estaren centrados no portugués, a nosa lingua irmá.